Penulis: Pdt. Juliana Zai, STh
Pendeta Fungsional HKBP Depok 1
Huria na hinaholongan ni Tuhanta Jesus Kristus! Ndang pola ulaon na maol mamereng hasalaan dohot hahurangan ni dongan, ndang pola na maol mandok angka dia ma hahurangan ni dongan. Andul do ummaol mamereng manang mandok hahurangan niba. Hape lupa hita dipanudu ni jarijari i sada doi tu dongan, tolu tu hita, lapatanna ingkon gumodang do hita introspeksi diri molo tasalahon dongan sahali ingkon tolu hali berengonta dirinta. Ido ra umbahen na ditompa Debata jari telunjuk songon i, sada manudu tu dongan na tolu na i tu hita. Menilai keburukan orang lain tidaklah sulit, justru yang sulit menilai diri sendiri. Di Mateus 7 : 3 didok “aha ma pola pabereng-berengonmu silbaksilbak na di mata ni donganmu, ia nasa tiang nadi matami dang diantoi ho”. Jala di dok do di Buku Endenta no. 267:1 “O Tuhan sulingkit ma au, sondangi rohangku tangkas. Gogongku soada di au. Tu Ho au paringgas, tu Ho au padonok, di Ho na ma au”. Tarbatas do hita manulingkit dirinta, alai anggo Debata sude do boi disulingkiti Ibana roha ni jolma. On do sipaingot Apostel Paulus tu huria Korint di turpuk on.
Surat 2 Korint 13 on ima pangujungi sude pangajarion ni Apostel Paulus tu huria Korint na mansai ribur jala gok parungkilon siala ni parbolatbolatan na masa di tongatonga ni huria i. Godang do hamaolon dohot parungkilon na diadopi huria Korint hatiha i dung di tadingkon Apostel Paulus huria i. Ro ma angka panggugai, apostel palsu, na paroaroahon barita ni si Paulus na mandok si Paulus ndada Apostel ai dang terdaftar ibana di si-12 sisean ni Jesus. Jala diida, ndang apostel na tutu si Paulus ala mansai gale, tidak keras, ndang mamora, ndang berapi-api. Diparoaroa nasida do si Paulus jala diparsoadahon nasida haapostelonna (2 Korint 11:5, Gal. 2:6-9). Gabe masa ma muse fanatisme golongan na mambahen huria i marbolatbolat jala balga do panghorhon ni parbolatbolaton i di ngolu parhuriaon. Marbonsir do i ala adong horong namamujimuji apostel nasada, jala apostel na asing dipatutoru (pat. 1 Korint 1:11-12).
Alai nang pe songoni ndang diambati jala diagohon parungkilon i apostel Paulus mambaritahon Barita Nauli dohot padimundimun huria i, alai lam tamba do ringgasna mangula angka ulaonna dohot marsihohot ibana patureture huria na rundut i. Jala dipaingot Apostel Paulus do huria Korint asa di na ro ibana muse mandapothon huria i, ingkon tangkas nasida mangolu songon huria ni Kristus (ay.11-12). Di turpuk jamita partangiangan on dipatorang si Paulus do paboa margogo pe ibana mangadopi saluhut angka hamaolon dohot hasusaan i holan ala pandonganion dohot pangaramotion ni Debata, silehonlehon ni Debata doi tu ibana jala diluahon dibagasan haserepon (toruk ni roha) dohot hasintongan, ndang hea disusai ibana halak baliksa tahe gabe torop halak taruli di asi ni roha ni Debata marhite ibana.
Debata do mangalehon hagogoon laho manghophop hasintongan. Molo tung godang pe na manosak aposteli mambaritahon barita Nauli ndang tahutan jala tunduk nasida ala ni abatabat ni parhuaso. Gariada tahe marhite na tarsosaki nasida lam tangkas panghatindanghononnasida di Kritus i. Di ayat 5-6 disosoi Apostel Paulus do nasida, tarlumobi angka guru palsu i, asa manangkasi diri, na tutu do Kristus mian di bagasannasida siala nasida mangajari asa ruas manghasogohon pribadi Paulus na maghorhon ruas ndang porsea di Barita Nauli ni Kristus na binoan ni Paulus. Rasul Paulus menegaskan bila mereka percaya kepada Yesus Kristus, mereka pasti akan tahan uji dalam segala keadaan.
Mansai ringkot do ganup halak Kristen manangkasi dirina manang na hot dope manghaporseaon di Kristus i, manang naung ditadingkon do haporseaon na sintong i? Hape molo so mangolu di bagasan Kristus sada halak (nang pe terdaftar songon ruas, jala dohot marminggu, jala digarar na patut secara administratif) ndang tau be ibana goaron halak Kristen. Apostel Paulus manghirim naeng ma sude halak Kristen marhatauon mangolu dibagasan Kristus jala satia, marsihohot marhaporseaon tu Tuhan Jesus.
Dipaingot apostel Paulus huria Korint asa manongtong hot nasida marhaporseaon di barita na uli napinasahat ni apostel i tu nasida. Unang lalap nasida holan namarpanungkun taringot tu ha-apostelon ni Paulus. Jala naeng tongtong nasida radot dihaporseaonna tu Jesus Kristus manang na so ditanda nasida dirina naung Jesus Kristus di bagasan nasida. Alani, tung mansai ringkot do intropeksi diri, apakah mereka beriman teguh kepada Allah. Asa marhitehon haporseaonna tu Jesus Kristus, margogo nasida laho mangantusi huhut mananda apostel i di tongatonga ni parsaoran nasida. Ai molo so Kristus di bagasan nasida, ndang tarbaen nasida manaon, ndang tau nasida lao mangadopi ragam ni parungkilon. Alani, ingkon tangkas botoon nasida na mian di bagasan Kristus manang na ndang ngolunasida.
Hamu dongan sahaporseaon, diboan apostel Paulus do huria i di bagasan tangiang asa manongtong nasida mangula nasa ulaon na denggan, i do parbue ni panandaion di Jesus Kristus. Dirajumi apostel i do, ia so mardonganhon Kristus ndang margogo ibana mangula angka ulaonna (mamaritahon barita na uli), nang huria i pe, laos so tandaonna do haluaon na tu ibana molo so tangkas panandaonna di Jesus Kristus. Alani i, sai ditogutogu si Paulus huria i asa tung tangkas manghatindanghon haporseaonna holan tu Jesus Kristus marhite barita na uli napinasahat ni apostel i. Dipasahat apostel Paulus do hata parujungan asa di bagasan las ni roha jala olo nasida patoguon jala apoan di bagasan nasa roha mangaradoti dame na sian Tuhanta. Tongtong nasida masitabian di bagasan dame dohot las ni roha. Hata panimpuli dipaujung si Paulus marhite hata pasupasu “Sai didongani asi ni roha ni Tuhan Jesus Kristus dohot holong ni roha ni Debata dohot parsaoran ni Tondi Porbadia ma hamu saluhutna” (ay.13).
Hamu dongan sahaporseaon, marragam do angka na masa dohot na mambahen hita marungkil dipartingkian nuaeng; di parkarejoan, lingkungan (luat), masyarakat nang huria pe. Di pataridahon turpuk on do tu hita poda na dipasahat apostel Paulus asa tangkas taboto, Debata do namangalehon hagogoon di hita, gabe Kristen na togu, apoan jala na mian di sada ni roha dohot hadameon. Jala ingkon ingotonta do, sai di dongani asi dohot holong ni roha ni Debata do hita, angka na porsea dibagasan ngolu siganupari. Alani i, ingkon togu ma rohanta maniop haporseaon i asa unang marumpak dibahen parungkilon dohot angka namasa dingolu on. Asa togu haporseaonnta, tontu ingkon ringgas ma hita manjaha dohot manangihon hata ni Debata (Rom. 10:17). Ingkon tongtong ma hita dibagasan las ni roha mangula nasa siulaonta (bdk Flp 4:4). Ai halak na tongtong dibagasan las ni roha maruli gogo mangalo hagogoon ni portibi. Jala ingkon pos do rohanta dipandonganion ni Debata, tung na so tadinghonon ni Debata do angka na porsea i nanggo sangombas pe. I do nang bagabaga ni Tuhan Jesus di na manek Ibana tu Banua Ginjang. “Sai na dongananku do hamu ganup ari, rasirasa ro ajal ni hasiangan on” (Mat.28:20). Pandonganion dohot pangaramotion ni Debata marhitehite Tondi Parbadia i do margogoihon jala patauhon hita mangulahon nasa na denggan, asa sai tontong marsangap Goar ni Debata di portibi on. Amen.
Upload: St. Dr. Ir. Hisar Sirait, MA