Oleh: Pdt. Nekson Simanjuntak, STh, MTh.
Praeses HKBP Distrik 28 – DEBOSKAB
Horas ma di amang dohot inang panjaha, nantuari nigurithon do tu hita adong sampulu na niputihan sian angka pandohan na adong di halak Batak na manggombarhon parrohaon na denggan. Parrohaon na denggan ima na dihalomohon halak Batak sian diri ni sasahalak. Tagoari ma i dison “Parrohaon Sipujion”, ima: Serep, Basa, Lambas, Dame, Lambok, Pantun, Toman, Porman, Bontor dohot Daulat.
Di tingkion tasigati majolo sadasada, ima: SEREP
Sai niuhal do nian angka buku na sinurat ni angka pande sian halak Batak manang halak na asing pe na manurathon tarigot tu Habatakon, alai domu tu hatorangan na pinarsinta ndang jumpang hita, ala holan pigapiga do buku “kamus”, ndang adong dope songon sada ensiklopedia ni habatak on.
Taringot tu pandohan “serep”. Serep ima pandohan na somal do dipangke halak batak di ngolu siganupari patuduhon manang manggombarhon parrohan ni sasahalak na mansai denggan, roha na tongtong martoruk ni roha nang pe tung mansai godang pambahenanna na denggan maradophon halak jala ndang olo paboaboahon pambahneanna na denggan i tu halak na asing asa dapot pujian. Parroha na serep tarida doi sian pambahenanna ru donganna: isarana timbo pe jabatanna alai sangap do halak na asing di ibana, mora pe ibana alai songon do dongan na pogos di ibana lapatanna tung so adong do neang manang ginjang ni roha jumpang di ibana. Halak na serep adong do roha na patujolohon halak, jumolo manghobasi asa sonang halak dungi tu dirina.
Dung niuhal jala pinikiran ia haroroan ni pandohan “serep” on, adong dua pandapotnami, ima:
Parjolo, marharoroan sian “sere” jala patuduhon parroha sere gabe “serep”. Sere ima mas naso marlaok (logam mulia, 24 Karat) tung ias jala hibul ndang adong sampur tusi manang aha pe. Jadi molo tagombarhon parroha na serep, ima parroha na ias jala na so adong marlaok manang adong sangkapsangkap di rohana, tung hibul jala ias. Angkup ni na ias jala hibul. Uhut ni mansai arga do sere sahat tu sonari on. Ditopa do serei tu angka na marguna isara ni perhiasan na arga songon: tintin, sibong, horunghorung dohot angka parhiasan na asing pe.
Paduahon, pandohan “serep” boi do marharoroan sian “serep”. Ima sada perabot ruma tangga na somal dipangke halak batak inganan ni mual manang aek siinumon dung dilompa. Somalna serep sai marisi doi di tonga ni bagas asa molo ro halak na mauas siani ma di buat asa sombu uas ni halak. Ingon unduk do serep laho mangisi mangkuk panginuman, dungi haruar ma aek si ibana. Molo ondo tapangke mangalapati pandohan serep ni roha marlapatan doi parrohaon na unduk laho patupahon na denggan maradophon halak na asing.
Laos ido jotjot dipodahon halak Batak taringot tu parrohaon na serep, sai dipatudos do tu biur ni eme, eme na porhis ima eme na unduk. Lam marisi jala porhis emei lam unduk do ibana. Asing do pangalaho ni lapung, molo laung sai dirgak doi jala meteletel dipaullusullus alogo, pintor bontar muse idaon hape ida ma so adong isina manang aha.
Rangkuman: parrohaon na serep ima parrohaon sipujion di tonga ni halak Batak ala ni ias dohot hibul ni roha laho mangula ulaon, hibul do rohana jala tulus so pola marlaok songon sere i. Parroha na serep ima parrohaon ni sasahalak na mansai uli ala dibagasan unduk di roha laho mangulaulaonna, manghobasi dohot mangaradoti halak asa taruli di angka parsaulian. Parroha na serep, nang pe naung godang diula na denggan ndang olo patujolohon dirina, alai sai jumolo do ibana pasangaphon halak.
Tahalaputi ma parroha na serep tung parrohaon sipujion doi na mansai arga.
Pewarta: Cst. Dr. Hisar Sirait (Seksi Pendidikan)