Penulis: Pdt. NEKSON M. SIMANJUNTAK MTh.
Horas ma di hita angka dongan panjaha, na parpudion sai nilehon do roha laho manurathon taringot tu parrohaon dohot pangalaho sipujion mangihuthon halak Batak molo taterjemahon didokmai karakter dohot etos kerja di tongatonga ni halak Batak. Las do roha di bangsonta ala adong partogi sitiruon di hita ima amanta Presiden Jokowi. Sitiruon hata dohot pambahenanna jala tarida nang di parangena pe na serep jala bulus mulaulaon. Maju bangsonta jala tarbarita ala ni parsitutuon ni partogina. Toho do na nidokna mamboan hamajuon ni bangsonta marhite “revolusi mental”.
Alai parpudion marungkil do hita marnida parrohaon dohot pangalaho na masa di bangsonta nang pe naung doras disoarahon amanta Presiden Jokowi naginoar “revolusi mental”. Taboto do tangkas parungkiloni, adong sahalak polisi na marpangkat mansai timbo mamunu anggotana. Loja do paihutihut baritai na sai torus siaran langsung di televisi mamungka bulan Juli taon na salpu sahat tu haputusan ni uhum na dijalona di pengadilan. Tubu tu roha songoni ma timbo ni jabatan dohot pangkat alai tung daul sian parrohaon nang pangalaho. Sidung i, pintor adong muse barita sahalak dolidoli anak ni parjabatan na timbo mamukpuhi manang “menganiaya” donganna pola matematene sahat tu sonari di ruma sakit ala ni angka paraleale ni naposo. Tarila do amantai songon natoras ala ni pangalaho ni anaknai gabe mundur ibana sian jabatan na timbo di departemen keuangan ni bangsongta. Songoni ma pangalahoi masa gabe parungkilon di bangsonta. Tontu molo tapaihutihut barita godang dope angka parrohaon na patutu siparungkilhononta na masa di bangsonta nang di na humaliangta. Tontu pangalaho masa haruar sian parrohaon jala parrohaon ni sasahalak tarida sian pangalahona. Ai didok halak Batak, tarbege do imbo sian suarana, tarboto do parrohaon ni sasahalak sian pangalahona. Molo lam timbo parsikolaan ni sasahalak laos timbo do nang panghiromon ni na torop di parrohaon dohot pangalaho sipujion ala nga tombo parbinotoanna na patut mangajari dohot pamodai. Lam timbo jabatan, pangkat dohot kedudukan ni sasahalak lam timbo do nang panghirimon ni situan na torop di parrohaon, parange nang pangalaho sipujion ai dijolo ibana siaduon jala dipudi ibana sipaimaon. Ai sahat ibana tu jabatan na timbo nga godang hatauonna tontu na dihirim do boi tiruan jala marguna ibana di jabatan dohot pangkatna ma timboi. Alai molo masa ndang saurdot panghirimon i tu na masa di ngolu ni sasahalak gabe masa ma na ginoaran “tarhirim”. Di tongatonga ni bangsonta dipabangkit parjabatan sasintong na adong do na dihirimna sian nasida boi mamparbuehon parbue na denggan marhite jabatanna. Alai molo masa naso ni hirim ni roha tung hamamago ma tutui, songon dua barita masa na ginoaran di ginjang. Adong do pandohan ni halak Batak, molo tarhirim ibana di pangalaho dohot pambahenan ni sasahalak pintor didok ma: “sambor ma nipim!”. Pandohan sambor nipi on, patuduhon marisuang na pinarsitta sian sasahalak, gabe mimbar roha nang pangkilalaan, tata roha jala malengleng ateate marnidasa. Na hansit do dihalak Batak roha na tarhirim, ai so adong ubatna ninna.
Asa porlu do mangarimangi parrohaon nang pangalaho ni halak angka na mangalap jabatan asa unang tarhirim halak gabe didok sisambor nipi. Ai sude do manghirim molo timbo pangkat dohot jabatanna hape ndang saurdot parrohaon dohot pangalahona. Domu tusi ma gabe tubu roha manggurithon songon dia do parrohaon dohot pangalaho sipujion mangihuthon halak Batak.
Upload: CSt. Dr. Hisar Sirait (Seksi Pendidikan)